mugati.com

Itxaro Bordaren ‘Boga Boga’ hautatu dute aurtengo jendaurreko irakurraldirako

Idurre — Sat, 27 Apr 2013 11:52:15 +0000

Ekainaren 5ean egingo da Akelarre elkartearen ekimenez, Hendaiako Mediatekan, eta jadanik zabalik da parte hartzeko izena emateko epea. Aurreikuspenen arabera, 9 ordu eta 109 irakurle beharko dira. Animatu!

Aurten ere, hutsik egin gabe, jendaurreko irakurraldia antolatu du Akelarre elkarteak. Itxaro Bordaren Amaia Ezpeldoi dektektibearen azken abentura hautatu dute aurtengorako, hots, BogaBoga eleberria.

5 minutuko saiotan eratzen dute irakurraldia, hau da, 5 minutuko pasartea leitzen du parte-hartzaile bakoitzak. Horrenbestez, Akelarrekoek egindako kalkuluaren arabera, 9 ordu eta 109 irakurle beharko dira. Goizeko 11etan abiatuko da saioa Hendaiako Mediatekan eta 20:00ak arte jardungo dute etenik gabe. Parte hartu nahi duenak hauta dezake zein garaitan irakurri nahi duen, eta irakurri beharrezko bi orriak fotokopiatuta igorriko dizkiote antolatzaileek. Posible da irakurle batek saio bat baino gehiago eskatzea.

Helbide honetan eman behar da izena: irakurraldia@gmail.com

Ez ahaztu: Mugatiko osteguna dugu bihar

Idurre — Wed, 10 Apr 2013 21:17:55 +0000

Bihar, hilaren 11n, 20:30ean, bilera Hendayesen. Noski, tragoekin eta konpainia onarekin amenizatuta. Ez ahaztu.

Hizketarako gaiak:

-Martxoan Euskaraz hilabeteko ekitaldien balorazioa.

-Hilean behingo euskarazko filmaren martxa: Herriko Etxeari egindako eskaria, visaren inguruko aukera berria, ekainera bitarteko filmen gestioa.

-Norberaren zakukoak.

Bihar arte!

Bertsolari filma gaur Varietesen; hitzordua 20:30ean

Idurre — Mon, 25 Mar 2013 08:30:21 +0000

Asier Altunaren Bertsolari filma emango dute gaur arratsean Hendaiako Varietes antzokian. 20:30ean da hitzordua. Filma ikusteko ez ezik,Asier Altuna zuzendariarekin, Amets Arzallus bertsolariarekin eta Laurent Dufreche montatzailearekin solasteko aukera izango da, baita mokadutxo batzuk dastatzekoa ere.

2011n Donostiako Zinemaldlian estreinatu, eta ordutik ikusleen zein kritikaren oniritzia jaso du heldu den leku guztietan Asier Altunaren Bertsolari filmak. Hain zuzen, bertsolaritzaren barneko hariak biluzten saiatzen da bertsolarien ekarpen eta ahotsean eta Altunak berak eratutako irudi joko eta metafora ederretan bermatuta. Ikusi ez baduzu ikustekoa. Eta ikusi baduzu, seguru, bigarrenean, aurkituko duzula zerbait berria.

Gogoratu, gaur arratsean, 20:30ean, Varietesen.

Bertsolari filma astelehenean Varietes zineman

Idurre — Wed, 20 Mar 2013 22:20:57 +0000

Zinema euskaraz ikusi ahal izateko parada izango da datorren astelehenean, martxoaren 25ean, Hendaiako Varietes aretoan, 21:00tan.. Zehazki, Asier Altunaren Bertsolari film ezagun eta goraipatua emango dute. Parada bikaina bertsolaritza modu eder eta atsegin batez hurbilagotik ezagutzeko.

Ez ahaztu, astelehnean, martxoaren 25ean, 21:00etan, Varietes zineman.

Hona hemen ahoa gozatzeko lagintxo bat.

Mugatiren osteguna, asteazkenean

Idurre — Sun, 10 Mar 2013 20:05:22 +0000

Hilabete bakoitzeko bigarren ostegunez izaten da mugatikideon bilkura, baina oraingoan, salbuespentxo bat egingo dugu, eta asteazkenez izango da Mugatiren osteguna. Beraz, hilaren 13an izango da batzarra, 20:30ean, Hendayesen.

Hona hizketarako gaiak:

-Mari Luz Estebanen hitzaldirako azken prestaketak.

-Zinema euskaraz: proposamena nola doan.

-Aurrera begirakoak.

-Norberak dakarrena.

Asteazkenera arte!

Mari Luz Estebanen hitzaldia emakumeez, zutaz, nitaz…

Idurre — Tue, 05 Mar 2013 20:03:20 +0000

Nortasuna, identitatea, generoa, eraikuntza, emakumea, emakumeak, ereduak, praktikak, feminismoa, maskulinitateak… moda-modako hitz eta gaiak ditugu hainbeste noraezeko garai hauetan. Horietaz arituko da Mari Luz Esteban antropologo eta pentsalari handia Hendaian, martxoaren 16an, larunbatez, Mediatekan, 18:00etan. Etor zaitez, ez zaizu damutuko.

‘Agur emakumeari’ da Estebanek aletuko duen hitzaldiaren izenburua: nola kategorizatu zuten Emakumea biologiaren inguruko zientziek, nola kategorizatu zuen feminismoak. Hain justu, nola feminismoak bere subjektua zabaldu duen eta Emakumearen lekuan emakumeak jarri duen. Nola ez garen emakume huts, edo gizon huts… Eta horrek guztiak nolako aukerak ematen dituen bestelako jendarte baten alde aritzeko.

Etorri beldurrik gabe, itxura batean gai lehorrak direla iduri dezakeen arren, Esteban primerakoa baita pentsagai horiek guztiak xamur, gozo eta dibertigarri egiten. Ondo pasako dugu! Martxoaren 16an da hitzordua, 18:00etan, Hendaiako Mediatekan, Mugatik Martxoa Euskarazen barruan antolatuta.

Ganorax taldearen \’Zeoze, o ze!\’ antzeslana, ostiralean

Idurre — Tue, 05 Mar 2013 19:48:58 +0000

Harremanei buruzko irakurketa batekin gozatzeko prest? Ba zoaz ostiralean, martxoren 8an, Hendaiako Mendi Zola aretora, 20:30ean, eta ikusi Ganorax taldearen \’Zeoze, o ze!\’ antzeslana.

Harremanak hariak dira. Horixe da Donostiako Ganorax antzerki talde gaztearen Zeoze, o ze! lanarenabiaburua. Harremanak hariak dira, eta lotzen gaituzte noizbait elkar ezagutu genuelako, kointziditu genuelako. Noiz eta non elkartu ginen; zertaz eta zerk lotzen gaituen. Aukera mugagabeak. Horietako batzuk ikusteko aukera izanen dugu emanaldian. Besteak beste, Dejabu taldearen Gure bide galduak antzeslan arrakastatsuan ikusi ahal iza genuen Iñigo Aranbarrik zuzendu du lana.

Martxoaren 8an da hitzordua, 20:30ean, Hendaiako Abadia gelan. Sarrera 5 euro. Mugatik antolatuta Martxoan Euskara egitarauaren barruan.

Etorri eta harrera beroa egingo zaizu.

Abadia eremuko Nekatoenea baserria berriro ere idazle bat aterbetzeko prest

Idurre — Tue, 26 Feb 2013 21:18:37 +0000

Datorren urrian Hendaiako Abadia eremu paregabean egonaldia egiteko aukera izango du idazle batek: Nekatoenea baserrian ostatu emango zaio hilabetez, eta, halaber, mila euroko beka. EKE Euskal Kultur Erakundeak, CPIE Euskal Itsasbazterrak elkarteak eta EIE Euskal Idazleen Elkarteak sustatzen dute egonaldia. Apirilaren 30era arte aurkez daitezke hautagaitzak.

Hirugarren aldikoz, Euskal Kultur Erakundeak, Hogei’ta labelaren kari, CPIE Euskal
Itsasbazterrak eta Euskal Idazleen Elkarteak (EIE) beren baliabideak eta gaitasunak
bateratzen dituzte gazte literatura egonaldi baten antolatzeko 2013an, Abbadia
Eremuan, Hendaian.

Egonaldia euskal idazle guziei zuzendua da.

TOKIA : Nekatoenea – Abbadia Eremua – 64700 HENDAIA
DATAK : 2013ko urriaren 7etik azaroaren 3a arte
IRAUPENA : hilabete bat
ARTISTARI EMAN BEKA : 1000 €

ARTISTAREN ATERBETZEA :
Tailer-apartamendu bat artistaren esku ezarria izanen da hilabete baterako
Hendaiako Abbadiako Eremuan, « Nekatoenea » deitzen den etxean.

EKOIZPEN ETA BALORAZIO BALDINTZAK
Egitasmoak bi zati ukanen ditu, eta hauek beharko dira ongi errespetatu :

1-Gazte literatura sorkuntza (hilabete batez), Hendaiako “Nekatoenea” etxean
Artistaren esku utziko da ekoizpen motaren eta lan gaien hautua, kontuan harturik
literatura sorkuntza euskaraz eginen dela. Hala ere, sorkuntzak oihartzun egin
beharko dio Euskal Kultur Erakundearen «Hogei’ta » deitu urte anitzeko programa
berriari. Programa horren xedea euskal kulturaren aniztasun osoa baloratzen duten
proiektu berritzaileak gazteengan eta gazteekin sustatzea da (ikus
www.hogeita.com)

2-Kolegio edo lizeotako ikasleekin topaketak egitea, obraren inguruan, eta hau
idatzia izanen delarik (2013 amaieran edo 2014ko lehen hilabeteetan).
eke icb

HAUTAKETA
Epaimahai batek du hautua eginen, hautagaitza txostenak aztertu ondoren.
Partaide egitura bakoitzak ordezkari bat izendatuko duelarik epaimahaian parte
hartzeko.

HAUTAGAITZA AURKEZTEKO EPEA : 2013ko APIRILAREN 30a
Txostenak (egitasmoa, CVa, erreferentzia literarioak, etabar) egor daitezke hiru
helbide hauetara, edo mailez, edo postaz :

EUSKAL IDAZLEEN ELKARTEA / DONOSTIA
Euskal Idazleen Elkartea · Zemoria kalea, 25 · 20013 Donostia (Gipuzkoa)
www.idazleak.org
eie@idazleak.org
Tel.: 943 27 69 99 · Fax: 943 27 72 88

EUSKAL KULTUR ERAKUNDEA / UZTARITZE
www.eke.org
etchegoin@eke.org
Lota jauregia – 64480 Uztaritze
Tel. 0033 5 59 93 25 25

CPIE EUSKAL ITSASBAZTERRA / HENDAIA
www.nekatoenea.eu
cpielittoralbasque.sorkuntza@hendaye.com
CPIE Euskal Itsasbazterra / Larretxea, Abbadiako eremua, rue Armatonde
karrika, 64700 Hendaia
Tel. 0033 5 59 20 37 20 Fax: 0033 5 59 20 47 20

Mugatiren osteguna, San Balentin egunez

Idurre — Tue, 12 Feb 2013 17:42:32 +0000

Datorren ostegun honetan, hilaren 14an (ai, San Balentin egun azukretsuz), egingo da Mugatiren hilean behingo bilera, 20:30ean, Hendayesen. Kupidok izango ote du kupidarik!

Hizketarako puntuak:

-Martxoan Euskarazerako antolatu ditugun bi ekitaldien errepasoa:
-Ganorax antzerki taldearen emanaldia martxoaren 8an.
-Mari Luz Esteban antropologoaren hitzaldia martxoaren 16an.
-Ekainera bitartean proposaturiko ekitaldien martxa: zinema proiekzioak.
-Hendaia ekimenaren ingurukoak argitu.
-Bakoitzak bere zakutik dakarkeena.

Beraz, ostegunera arte.

Ikastola, herri eskola!

Idurre — Wed, 30 Jan 2013 15:24:31 +0000

Baionako suprefetak Hendaiako Herriko Etxeari ikastola diruz laguntzeko ezarri dion debekuaren aurka manifestazioa egingo da larunbatean. 17:00etan abiatuko da Geltokitik, Ikastola, herri eskola! lelo hartuta. Hendaiako ikastolaren eraikin berria, eta, ondorioz, ikasleek beren jardueretarako gune egoki bat izatea erabaki horren menpe dago. Baina Hendaiakoari ez ezik, Ipar Euskal Herriko ikastolei eragiten die erabakiak.

Informazio gehiago hemen.