Heldu den otsailaren 4ean, larunbatez, Agate Deuna bezpera ospatuko dugu. Euskal Herriko ohiturari jarraikiz, kantuz eta eskean arituko gara Hendaiako karriketan barrena. Arratsaldeko 5etan Les Allées etorbideko farmaziatik abiatuko gara ondoko leku hauetan kantatzerat geldituz :

- Les allées etorbideko farmazia, arraindegia
- Herriko plaza gibeleko La Poste ostatua
- Herriko etxea, plazako Bidasoa ostatua
- Portu karrikatik beheiti hartuz Maitena ostatua.
- Askatasunaren etorbidetik goiti Baleak elkarteraino.

Arratsaldeko 18:30tan Baleak elkartean krakada eginen dugu : bakoitzak jateko zerbait ekarri behar du.

Bakoitzak makila ekarri behar du eta gomendatzen dugu baserritarrez jantzirik etortzea edo bederen buruko zapia edo eta txapela janztea.

Baina nundik heldu zaigu ohitura hau ? Kristautasun aintzineko ohitura zaharra litzateke, mito paganoetan oinarritua. Neguko solstizioarekin luke harremana, izan ere, ihauteri garaian sartuz, engoitik iluntasunetik argitasunerat iraganen baikara, emeki-emeki egunak luzatuz eta gauak laburtuz joaki direlakotz. Lurraren iratzartzea ospatzen da beraz, makilaz lurrean joz eta etxez etxe horren berri emanez.

Entsegua : ortzirala, otsailak 3, 16:45ean Irandatzeko Gure Ikastolan.

Hona hemen bertsoak :

1.
Agate Deuna bezpera dugu
Amalurraren eguna
Gure herria kantuz alaitzeko
egun hautatu duguna
Makil ederra hartua dugu
bidez bideko laguna
Kolpez kolpe lurra iratzarriz
hara gure zoriona

2.
Zorion etxe huntako denei
oles egitera gatoz
atez ate gure ohitura zaharra
aurten berritzeko asmoz
ez gara arras aberats sosez
ezta ere oinetakoz
baina zintzurra azkarra dugu
ta kanta nahi dugu gogoz

3.
Mendi kaskoak elurrez xuri
loriopean laiotza
etxe huntako famili handiak
urrezkoa du bihotza
umore onak kendua gaitu
eskean hasteko lotsa
sosik ez bada ez gaitu inportik
hartuko dugu bildotsa