Gure Mugati honek helburu batzuek eta gutxieneko funtzionamendu arauak finkatzea eskatzen zuela aipatu genuen azken bileran. Taldetxo bat geratu ginen gure artean gaia aztertu, eta blogaren bidez elkarteari proposamena egiteko. Hor doa, beraz. Proposamen bat besterik ez da, gure ustez abiaburu izan daitekeen zerbait, baina eztaibara guztiz irekia. Are, zuzenketak ez ezik, erabateko zentsura mozioa ere onartzeko prest gaude. Zuek esan.

‘Mugati, Hendaiako euskaltzaleak’ taldearen helburuak

Euskararentzako eta euskaldunentzako “habitat” edo habia egokia sortzea Hendaian.  Azken finean, euskaraz bizi ahal izatea. Horretarako, euskara hegemonikoa den guneak sustatuko ditu, eta, halaber, herriko gune hegemonikoetara eramango du euskara.

Euskaldunen kopurua handia da Hendaian, baina mugako giza geografiaren zein herriaren beraren ezaugarri soziopolitiko, linguistiko zein urbanistikoen ondorioz elkarren ezagutzarik gabe bizi dira askotan euskaldun horiek, euskalduntasuna osoki bizitzeko aukerarik gabe. Beraz, euskaldunen komunitatea saretzea eta trinkotzea da Mugatiren egin beharrekoetako bat: euskara eta euskaldunak ikusgarri egitea, lurpean dagoela susmatzen dugun hori azalera ekartzea.

Euskara eta euskaldunen ikusgarritasun ezari Frantziako Estatuak ezarritako ofizialtasun eza eranstsiz gero ondorioa da tokiko administrazio eta erakundeentzat euskararen aldeko politikak ez direla lehentasuna, eta, gainera, egiazko hizkuntza politika baten kontra irmo xamar eragin dezaketen sektoreak badirela herrian. Hori dela eta, hizkuntz politikaren arloan presio talde gisa jokatu beharko luke Mugatik, tentuz eta pixkanaka, baina hizkuntza politika bizkor bat Hendaiako bizilagunen zati handi baten nahia dela adieraziz. Pixkanaka-pixkanaka, eta bere jardunarekin hartarako zilegitasuna eskuratzen duen heinean, Mugatik lortu beharko luke tokiko administrazioaren interlokutore izatea arlo honetan. Zentzu berean, Hendaiako gizarteak berak eraman lezakeen euskararen aldeko hizkuntza politika hausnartu eta bultzatuko du. Horretarako, eragile sozial eta herritarrekin, egoeraren diagnosia egin eta estrategiak finkatuz.

Lehenagotik ere badira euskararen aldeko ekimenak eta kultura arlokoak Hendaian, baina sarritan uharte modura, elkarren arteko inolako lotura eta ezagutarik gabe. Ondorioz, euskarazko kultur jardun horrek ikusgarritasuna eta indarra galtzen du.  Mugatik lagundu beharko luke ekimen horiek denak koordinatzen eta euskaldunen komunitatearentzat zein, oro har, hendaiarrentzat ikusgarri egiten.

Funtzionamendua

Eragingarri izateko eta helburu horiek lantzeko gutxieneko egitura bat eman beharko zaio taldeari. Hasteko, lau lan ildo sumatzen dira, eta horietako bakoitza batzorde batek landu beharko luke.

1-Kultur arloa; euskal kultur arloko ekitaldien sustapena. Badira jada bidea egiten hasi diren atal batzuk, zineforumarena kasu. ‘Henry Bengoa inventarium’ berriz egiteko proposamena ere ari da bidea egiten; Irene Nemirovskyren inguruko jardunaldiak eratzekoa… Hala ere, ordenatu eta helburu batzuk finkatu beharko lirateke, adibidez, urteko programazio-eskaintza txukun eta osatu xamar bat eratzea.

2-Kale bizitza/sentsibilizazioa/komunitatearen trinkotzea. Kultur ekitaldietara jende mota bat etorriko da, baina nola zabaldu esparru hori? Nola zabaldu euskara Hendaiako eguneroko harreman sarera? Euskaldunon arteko elkar ezagutza eta harremana bultza dezaketen dinamika eta ekimenak abiatzea litzateke batzorde horren egitekoa. Hasi afari eta poteoen gisako klasikoetatik edo merkataritzaren arloko ekimenetetatik… eta hortik aurrera bururatzen zaiguna! Frantsesez edo gazteleraz aritzen diren talde eta elkarteetara euskara hurbiltzen ere ahalegindu beharko litzateke batzorde hori.

3-Lan ‘politikoa’ eta pentsamenduaren arlokoa. Nolako hizkuntza politika egiten du Hendaiako Herriko Etxeak? Badago indargunerik? Zein dira eskasia nagusiak? Zenbat euskaldun gara Hendaian? Ziurrenera, diagnostiko soziolinguistiko txiki bat egitea izan beharko luke batzorde horren lehen lana, eta hortik abiatuta herritarrek osatutako eragile gisa hizkuntza politika eragingarri baterako proposamenak egiten hasi. Arlo horretan lanean ari diren beste eragileekin harremanak eta lankidetza landu beharko lituzke, herrikoekin zein eremu zabalagokoekin.

4-Komunikazioa eta taldearen egituraketa. Komunikazio arloan izango da lanik, kanpora zein barrura begira: Mugatiren ekintzen berri eman, bilera deialdiak, blogaren kudeaketa… Eta garrantzitsua, Hendaian euskararen eta kulturaren arloan ari diren beste taldeen ekimenak jaso eta euskarri bakar eta ordenatuan argitaratzea, maiz-maiz aipatzen dugun agenda sistematikoki osatzea. Talde egiturari dagokionez, batzorde bakoitzak bere bidea egingo badu ere komeniko litzateke norbaitek haien arteko koordinazioa edo harremana bere gain hartzea.

Funtzionamendu orokorrerako, batzorde bakoitzak arduradun bat (gutxienez) beharko luke -gerora azpibatzordeak sortuz gero, haiek ere izan beharko lukete arduradun bat-, eta arduradun horiek osatuko lukete maiz aipatu dugun talde txikia.Talde txiki hori izango litzateke Mugatiren egunean eguneko martxa sustatu eta erabakiko duena, eta hilean behingo bilera zabalean emango lukete egiten ari direnaren berri. Halaber, hilean behingo bilera zabal horretan Mugatiko kide guztiek izango lukete beren ikuspuntu, iritzi eta proposamenen berri emateko aukera. Talde txikiko kideen artean, ‘Komunikazio eta taldearen egituraketa’ batzordeko arduradunak har dezake batzordeen eta batzar zabalaren arteko harremanaren kudeaketa: deialdiak egin, aktak jaso…

Badira, halaber, funtzionamendura eta talde egituraketara begira aztertu beharko genituzkeen kontu batzuk:

-Bazkidetza moduren bat egingo dugu Mugatiko kide izateko? Gutxienez, errolda-zerrendaren bat? Deialdirik egingo dugu egitasmoa aurkeztu eta oraindik ezjakinean egon daitekeen jendea ekartzeko?

-Diru-kuotarik ezarriko dugu bazkide izateko? Batetik, konpromisoa hartzeko modu bat izan daiteke, serio ari garenaren seinale. Bestetik, azpiegitura ekonomiko minimo bat beharko du taldeak, besterik ez bada kartelak egiteko. Baina, egia esateko, tristea ere bada konpromisoa dirutan neurtzea… Formula misto bat ere plantea daiteke: borondatezko diru-kuota, kasu.

Sarreran esan bezala, honakoa proposamen bat baino ez da. Bota, bota orain zuen iritziak, proposamen hau goitik behera botatzeraino!